最受歡迎的老師

有一個與我一起讀小學的新加坡朋友同我講，今次香港真係輸九條街。有一個調查，講全世界最受出國工作僱員喜歡的地方，沒有意外，新加坡又排第一，香港下跌了19名，排70幾，今次，香港想唔認衰都唔得。

我話在新加坡面前，香港人根本抬唔起頭，我反問小學同學，既然新加坡咁好，點解又要嚟香港工作？小學同學話，如果唔計外勞，新加坡對到來工作的外籍人士是非常優待，但新加坡人在新加坡工作又唔係咁值錢，所以優質的新加坡人反而會離開，同學這個論調我覺得有多少奇怪。

不過，到新加坡工作的人見到這個情况，自然會對新加坡有好感，好似有一個朋友嚟食飯，他將雞髀給了客人，自己與家人食雞胸，一定會得到客人好感。

老實說，到新加坡打工的外籍人士好似遊牧民族，總有一日，新加坡政府不能滿足他們的要求，或者其他地方有更好的待遇，那些人便會離開，這個銜頭不攞也罷，同學冇乜表情。

我問同學記唔記得大家讀小學時，到下學期學校一定會叫同學寫一篇文章叫「我最喜愛的老師」，小朋友沒有什麼機心，大家都會選出一位畀分很手鬆並不嚴厲的老師。小朋友並不知道，最受歡迎的老師其實是一道催命符，學校會檢討那位老師的教學方法，隨時會開除教席，而不受歡迎的老師反而唔使擔心，是否很奇怪？

事實上，學校需要的是教學非常嚴厲的老師，確保學校成績處於領導地位，所以，今次新加坡得到最受出國工作僱員喜歡的地方並不是好事。

不過，香港去到70幾又當然唔好，唔知道內情的人以為去香港工作，隨時會被拉入中國大陸坐監。

外籍僱員在新加坡的確優哉游哉，日日都好似放假，得閒又可以去賭場玩兩手，有兩三日假期，唔去吉隆坡、檳城，都可以去布吉追吓女，有咁嘅工作環境，有乜辦法不是受到去外國工作的打工仔歡迎。

原刊於《明報》，本社獲作者授權轉載。

湯文亮

紀惠集團行政總裁及副主席，2012年獲頒世界傑出華人獎、2016年獲頒香港浸會大學榮譽大學院士榮銜，以彰顯其傑出的企業家精神及領袖才能。1976年創立紀惠集團，對經濟發展具前瞻觸覺和分析力，在物業投資方面尤甚，帶領紀惠集團從一間小公司於2018年晉身至福布斯（香港區）排名25。著作有《讀歷史，了解香港地產》、《第十個人理論》、《逢三退一》，包括紅極一時「細價樓爆煲論」等10本著作，亦是專欄作家，作品在不少報章、網站及國內媒體發表，網站點擊已逾10億次。

View all posts