利好因素多 今年樓市料大升

去年無論任何專家預測股市樓市，大多數錯到離晒譜，就算有人估到股市樓市一齊下跌，都唔會估到兩者都是下跌15％，既然是下跌，我認為不能用叮噹馬頭來形容，不過都已經過去，唔輸都輸咗，唯有寄望今年。

今年股市樓市，會不會好似相傳王羲之所講，福無雙至今朝至，股市樓市都有運行，我認為機會很大，至於升幾多，會不會好似去年一樣是叮噹馬頭，這個我唔敢肯定，但我認為股市升幅應該會比樓市大，但千祈唔好以為樓市會升得少，如果順順利利的話，中原指數極有機會今年破頂。大家可能唔記得，中原指數最高點是191.34，要破頂就最少要升20％，而市場上對樓市最樂觀睇法就是中原傑哥，佢話升15％是有可能，我認為佢擔心激親老闆老C，所以講得比較保守一些，無謂令老C難受。

樓市點解會升，我認為除了利息之外，所有因素都利好樓市，唔會再有業主賤賣，加價封盤已成新常態，估計有不少買家在冇樓睇的情下以開盲盒的心態買樓，出價仲會非常進取；至於利息，在今年第四季一定會下調，除非拜登唔準備繼續做總統。

港府增專才名額 勢成樓市生力軍

移民潮困擾了香港兩三年，的確有不少人賣樓移民，直接令香港樓價下跌，但今年不但移民離開的人會減少，甚至有港人回流，對樓市是有積極正面作用，但如果沒有催化劑，樓市是唔會升。

樓價下跌最主要的一個原因，就是受制於外來人士在港買樓印花稅，基本上很少人會在香港買樓，換句話說，沒有足夠購買力來補充，樓市又點會唔跌，好彩特首宣布居港7年的專才如果買樓，可以退回已繳的印花稅，但可惜專才人數不是太多，去到盡每年只得4000人，特首送佛送到西，跟宣布在未來3年，每年有3.5萬名額，那些高薪專才很大機會成為樓市生力軍，在這個情下，樓價又點會唔升。至於股市，就算升20%，與高峰相比仍然有一段距離，所以，我認為叮噹馬頭是不會出現，股市升幅會高過樓市。

原刊於《明報》，本社獲作者授權轉載。

湯文亮

紀惠集團行政總裁及副主席，2012年獲頒世界傑出華人獎、2016年獲頒香港浸會大學榮譽大學院士榮銜，以彰顯其傑出的企業家精神及領袖才能。1976年創立紀惠集團，對經濟發展具前瞻觸覺和分析力，在物業投資方面尤甚，帶領紀惠集團從一間小公司於2018年晉身至福布斯（香港區）排名25。著作有《讀歷史，了解香港地產》、《第十個人理論》、《逢三退一》，包括紅極一時「細價樓爆煲論」等10本著作，亦是專欄作家，作品在不少報章、網站及國內媒體發表，網站點擊已逾10億次。

View all posts