星期日早上去到茶餐廳，有客人話我講得無錯，今年樓市旺季的確提早來臨，除了二手樓成交不俗之外，新樓盤銷售情況熾熱，不過美中不足的是有「摩貨」出現，而且數量不少，賺價亦不少，唔知道政府睇到會不會再推出印花稅「辣招」。
老闆話不用擔心，其實樓市飈升有助政府賣地，對政府財政有莫大幫助，有地就自然有樓供應，可以遏止樓價升幅，又點使推出印花稅「辣招」，至於新樓盤出現賺價不俗的「摩貨」，其實啱晒地產商「合尺」，「摩貨」出現才會確保新樓盤順利成交。
樓市升助賣地 未必需辣招
以前當新樓盤清枱兼出現賺價不俗的「摩貨」，負責銷售阿頭一定會被老闆「照肺」，為免孭鑊，往往將售價定得很高。由於當時樓市熾熱，經常都「一Q清枱」，但到入伙時，不少只交了訂金的買家選擇撻訂，樓盤有大量空置單位。地產商最後要大減價促銷，但又令到準時交易的買家唔開心，極有可能會撻訂，點解出現這個情況，就是樓盤沒有出現賺錢「摩貨」。
現在新樓盤出現「摩貨」，反而確定在入貨時沒有買家撻訂，首先，買「摩貨」的人不會撻訂，因為他交了「三重錢」：樓價訂金、上手賺價及印花稅，而沒有「摩」出的業主見有不少「摩貨」交易，普遍都有10幾至20巴仙賺價，同樣唔會撻訂，無理由有錢唔賺兼輸樓價訂金及印花稅。到入伙時，就唔會有人唔成交，地產商順利收錢，點會嫌棄新樓盤出現「摩貨」。
原刊於《明報》，本社獲作者授權轉載。
