星期四早上去到茶餐廳，聽到有客人話近兩年差不多所有物業投資者都損手爛腳，但客人有一個做物業投資的朋友，經常風花雪月，唔聽到佢講蝕錢，究竟朋友做什麼類型物業投資者？
老闆話，客人的朋友非常之有先見之明，知道樓市即將調整，而自己手上物業唔係咁容易出售，於是化整為零，拆售手上最難賣的物業，就是那些podium式商場。將一個podium或者酒樓，分格成幾十個小型商舖，然後用高佣金，保證兩年回報出售，仲話一個車位價錢，就可以買到一個舖位，唔買就笨。當時銷情都唔錯，就算未能「一Q清袋」，但亦差不多，現在諗返轉頭，那些投資者真係叻，說他們是最有先見的投資者亦不為過。
其實，還有一些投資者更加有先見之明，知道拆售podium式商場有利可圖，於是低價買入一些廢棄的樓層或者酒樓，間細之後以商場舖形式出售，獲利當然可觀，但都是一次式，買入那些商場舖的人日後很難搵到新買家，就算連租客都很難搵。
那些商場慢慢地變成港式城中村，只剩一些修甲、按摩、修改衣服的小生意進駐，可以說那些podium式商場永無翻身之日，以一個物業投資者來說，如果並沒有持有那些商場舖，都可以說是一個有先見的投資者。
原刊於《明報》，本社獲作者授權轉載。
