今日早上去到茶餐廳，老闆話大富豪暫停營業，有冇客人在重開之後去過大富豪，不但冇客人去過，甚至連提及也很少，如果不是突然暫停營業，相信大家都唔記得大富豪。
消費者態度早已轉變
雖然鄧小平話香港舞照跳、馬照跑，但如果大富豪不是一個投資移民項目，根本唔應該重開，畢竟現在消費者的態度與以往不同，以往要豪，一晚與一大班唔係咁相熟，甚至唔認識的人飲酒，消費大幅高於收入。不過，當時除了正職之外，飲酒作樂亦可以做到不少生意，搵到不少外快，如果不是有額外收入，一樣唔會有咁多人去俗稱銷金窩的娛樂場所。
現在唔好講香港，就算其他大城市，好似紐約、倫敦、東京等，都很難搵到大型娛樂場所，不過，如果與賭場掛鈎則例外，所以，大家仍然可以在新加坡、澳門、拉斯維加斯搵到大富豪式娛樂場所。
富豪自有消費處
大家又唔好以為有錢佬冇地方消費，有一些私竇可以替他們安排，搵一些靚女，開定幾支靚酒，大家猜吓枚，講吓鹹濕笑話，不亦樂乎；消費比去大富豪平得多，而且私穩度高，唔使應酬那些所謂江湖大佬，一不小心，很容易惹禍上身。
以往大富豪的消費群是香港人以及外國生意人，國內人並不多，今次大富豪重開，相信目標消費群是國內人，其實是錯到不得了，現在國內的有錢佬都非常低調，去大富豪咁揚，很容易出事，沒有國內大富豪，生意又點會好，投資者有見及此，暫停營業是可以理解。
原刊於《明報》，本社獲作者授權轉載。
