星期六早上去到茶餐廳，有客人話生意難做，每個月都蝕多少，又睇唔到前景，打算執咗盤生意，早日享受退休生活。
老闆話如果真係冇得做，早日執咗佢好過，不過，最緊要是按勞工法例賠償畀員工，千祈唔好問大耳窿借錢繼續做落去。現在做生意，有得做就有得做，冇得做就冇得做，千祈唔好懷緬以往生意做唔切的昔日風光。在茶餐廳經常都聽到有客人問人借錢來維持生意，但最後不但欠落一身債，而且仲欠賠償畀員工，跳樓都唔掂。那時候，那些人就會話早知當日趁有錢賺的時候執笠，現在就唔使咁煩。
老闆問我，現在賣樓，尤其是蝕本賣樓，有沒有壓力。老實說，壓力大到不得了，做生意唔會每一次都賺，買股票買樓亦唔會次次都贏。
做錯決定，蝕本賣股票賣樓絕對不出奇，但一定要自己賣，唔好畀銀行沒收物業變成銀主盤之後由銀行賣。因為由銀行賣，一定唔會賣得好價錢，並不是銀行壓價，而是買家知道，業主冇話語權，唔壓價就笨。不過，自己賣樓有兩個條件，一是準時還款，二是資不但要抵債，而且仲要有相當水位。
雖然有人話可以將物業向其他財務機構加按借多兩成，夠捱一段時間；此方法短時間是冇問題，長時間反而會泥足深陷。好似一盤蝕本生意，勉強捱落去，最後仲欠更多錢，更難解決問題。現在做生意及做業主都係咁困難，有問題早日了結比較好。
原刊於《明報》，本社獲作者授權轉載。
