星期六早上去茶餐廳之前，去了馬場跑步，見到一個跑友箍了紅護膝，本來沒有特別，但經加州州長紐森「帶貨」，現在紅到發紫，問跑友幾多錢一對，跑友話紐森要100 美元一對，而且現在無貨，想買就要快手訂第二批。
跑友在內地買，唔講價都只是要20 元人民幣一對，在美國買一對，可以在內地買30 幾對。由此可見，美國貨除了iPhone 、芯片之外，其他真係無競爭力。有人話，今次紐森「帶貨」，在無心插柳之下，都算賺返一筆，可以咁講，但相比特朗普所賺，只是細眉細眼。
去到茶餐廳，有客人話歐洲班領導人被特朗普侮辱已經慘，現在再被紐森加多腳，真係無地自容，但又唔能夠發爛渣，畢竟紐森是特朗普競爭對手，下一屆隨時會做美國總統，現在得罪紐森，隨時會為未來種下禍根。
歐應盡快助結束俄烏戰事
老闆話，歐洲班領導人都是自己攞嚟，俄羅斯打烏克蘭的確唔啱，但歐洲各國應盡快協助結束戰事，逼烏克蘭割地求和，又唔係未試過。歐洲多個國家百多年前聯合一起逼清政府割地賠款求和，唔使將自己捲入戰爭漩渦；現今支援烏克蘭同俄羅斯打，又唔夠俄羅斯打，如果美國唔幫手，真係有排驚，分分鐘自己要割地賠款求和，現在不但不能夠得罪美國，甚至要跪都無辦法。
現在最驚的是特朗普唔准他們用護膝，經過今次之後，歐洲各國應該明白，以後都唔好咁多管閒事，分分鐘惹禍上身。
原刊於《明報》，本社獲作者授權轉載。
