星期六早上去到茶餐廳，有客人話，西方傳媒認為今次「習特會」唔稱得上成功，中美有很多問題仍未解決，但香港人就覺得唔錯，起碼沒有惡化。至於未解決的問題，就好似四川人話，食一餐火鍋，一餐搞唔掂就食夠兩餐，習特會又點會一次可以傾掂，甚至傾幾多次都唔會掂。不過，點都會傾，問題仍在解決中也是解決問題的一種方法。
老闆話，習特會雖然無解決中美所有問題，但令到很多有切身利益的人很無奈，首先是台灣，習特提都無提，特朗普甚至重申一個中國政策都唔講，叫台灣人情何以堪，被人忽略的滋味是很難受。
其次是日本，新任日本女首相高市早苗跟出跟入，布定局特朗普又唔上當，始終沒有向日本國旗鞠躬，其實想都想得到。日本與周邊國家俄羅斯、中國、韓國都有好大仇口，如果沒有美國照住，日本早已沒有了，特朗普又點會向日本國旗鞠躬，今次是高市早苗高估自己，Punk 女想法是有啲不同。
荷蘭接管安世 唔知點收科
最無奈應該是荷蘭，為了執行美國的50%穿透性規則，接管由中國企業聞泰科技100%擁有的安世半導體。老實說，沒有穿透性規則，荷蘭政府亦樂意這樣做，當日蝕大本的時候賣畀聞泰科技，今日賺大錢的時候接管，比強盜更狠，強盜只會搶，不會要你買，現在荷蘭政府賣畀聞泰科技，做得好又搶返，一毫子都唔畀，真係夠狠，但現在穿透性規則暫停1年，荷蘭可以唔沒收安世半導體又唔會被美國指摘，但現在已經出了手，甚至影響全歐洲車企芯片的供應鏈，今次唔知點樣收科。
今次習特會，最主要是稀土，現在中國稀土維持正常供應1年，美國當然無問題，但沒有講歐洲，除了荷蘭、德國、法國、英國等，全部都受到影響，都唔知美國會不會關照他們。如果沒有稀土，歐洲的科技就會被中美大幅拋離，歐洲大國跟隨美國，現在真的是很無奈。
原刊於《明報》，本社獲作者授權轉載。
