星期二早上去到茶餐廳，有客人話，聽到有專家表示香港樓市上升唔正常，新樓盤超過一半，二手樓超過四分之一是由內地人買，如果他們唔買，甚至將買入的樓宇賣走，香港樓價一定會大跌，所以，現在要趁好價將物業賣走。
老闆話，那名應該是專家不是磚家，根本唔知道內地人與香港人買樓有什麼分別。買樓的香港人並不一定是買樓，可能是換樓，買了一個單位，就有機會賣走現在的自住單位，需求增加，供應亦同時增加，雖然需求會大過供應，但總括來說，香港人買樓對樓價影響不大，只是隨着年份穩步上升。
內地人買樓後較不捨得賣
內地人買樓就唔同，他們很難才可以在香港買樓，買樓比買名車、名牌包包的優越感更大，而且那些名車、包包全部都會快速貶值，只有香港的樓宇有機會升值，而且升得好勁，朋友知道在香港有一個單位都不知幾羨慕，試問又點捨得賣。如果真係要賣樓而又被其他人知道，都唔知會點講，當然唔會講得好，一定會話賣樓的人出現財困，咁嘅情况，除非迫不得已，否則唔會賣樓。
換句話說，內地人只買不賣，即使需求大增，但供應接近零，所以，不用擔心內地人今日買樓，明日賣樓造成供應大增、樓價下跌。那些還未買樓的人，不如擔心租樓畀自己的業主可能是內地人，咁樣就真係瞓唔着。
原刊於《明報》，本社獲作者授權轉載。
