要問我今天世界誰最吸睛，我肯定選美統。特先生如果按自己的網hit率向世人收費，我估可能收入多過美國而家收取全世界的高額關稅。白宮何須逐個國家擙⋯⋯咁辛苦！
或因此，而家幾乎係人都知特統勁愛出風頭，佢happy，乜都易話圍，否則全世界都受罪。因此，人人爭住擦。日前，國際足協特地到白宮為來年的美加墨世界盃決賽周抽籤，更無厘頭地頒個「和平獎」俾阿統。
國際足協與和平獎何干？何來此權威頒發？但肯定係知道特統恨和平獎恨到發燒，而挪威的衰鬼又肯定唔肯合作，於是乘虛而入，𠱁大王歡喜，從而高抬貴手，俾明年既世界盃大發特發。
俄統拒撒手烏 特朗普徒費唇舌
特統君臨天下即將一年，幾乎每日嘅話題人物都係佢，古今中外可能冇幾多人風頭有咁勁。使我想起毛主席的《沁園春・雪》：
惜秦皇漢武，略輸文采；唐宗宋祖，稍遜風騷。一代天驕，成吉思汗，只識彎弓射大鵰。⋯⋯數風流人物，還看今朝。
但上天說到底有分寸。所謂世間萬物，相剋相生。無論多惡的人或物，總有一樣嘢可以剋住。特統年來長袖善舞，無往不利，只俾一個人卡死：俄統！佢同俄統拗咗成年，軟硬兼施，都說服唔到對方撒手烏克蘭。
美統並非鍾意烏克蘭，而係從商人角度出發：打仗燒錢死人，事後仲要花天文數字重建，簡直神經，息干戈賺錢發財咪好囉！
俄統正係睇死美統份人功利，反戰並唔係為「正義」。更何況烏軍輸緊，難以翻本。美統既然怕上身，俄統大可憑戰場優勢死拖，美統最終只有逼烏方投降割地來換取停戰。美統對俄統這一仗輸得大。
原刊於作者網誌，本社獲作者授權轉載。（原文按此）
