美國每2人就有1人用TikTok。果真，剔除3.5億人裏的60後（長者不善用手機、較少看視頻）和未懂人事的5歲前，在國民裏的佔比或高達三分二。
若此，如今美國人鍾意呢款中國killer app到要自己來run，又唔係唔可以理解。But then, Mr. President, what do I get in return?
10萬美元的笑話
另一個「笑話」係：據說有應邀赴美工作的印度專才在飛美（大概是矽谷所在的三藩市）班機上突然聽講，持專才類簽證H-1的外國人要交10萬美元後，嚇到即刻要落機，怕入境時冇得俾錢要鎖起。
美統顯然是得悉他的偉大政策引起恐慌，立即澄清：10萬美元並非年費，而是一筆過。換言之，如果上述印度專才做滿一年後，獲同一僱主續約，其後各年的薪水就袋袋平安。
但即使只交一年，10萬美元都唔係小嘢！
矽谷的中層技術人才，恐怕也不過年入20萬至50萬美元。扣除合計大約三分一的聯邦（中央）、州（中國的省/自治區）、地方（住所的市鎮）三級稅，還有各種保險，加上超高的矽谷衣食住行（住屋月租動輒三、五千，仲有sales tax, toll charge, 25%嘅小費），就算簽約3年，每年交3.3萬來支持MAGA，都幾喇脷！
不過，以矽谷的薪給和工作、生活環境，發展中地區的專才仍會前仆後繼，嗰10萬唯有當中間人食水深啦！而家到處偷呃拐騙，呢10萬至少係大總統收嘅！Thank you, Mr. President！
美統日理萬機
再講，都唔好話唔服呢位美統。79、80歲人，似乎每日都坐好幾個鐘飛機。日前才係倫敦返來，單程7個鐘，下月又要飛15至16個鐘去韓國開APEC，與我們的主席話舊。明年初再飛15至16鐘去北京。即使在專機上享有帝王級侍候，也還要應付時差。落地後要擺出總統的儀態，與東道主談笑傾生意、應付刁鑽的記者、回應下屬的請示。
但至今未聞美統年輕時愛運動、體格特好。以大總統的性情，後生時多數係party animal。何況此人當年高富帥，佢唔搵人，人地都撲埋來。美國男生開party，你know what，唔使我畫公仔畫出腸。到此年紀，仍能日理萬機，絕對係人之中的例外。此人看來天生有的福份。
你仲話個天係公平嘅？
講起10萬美元，擱筆前突然想起：美統剛就任時bragged about的500萬美元黃金移民簽證，不知為國庫收到幾多億？
原刊於作者網誌，本社獲作者授權轉載。
