星期六早上去到茶餐廳，有客人話一年容易又中秋，雖然未到中秋節，但咁又過了半年，上半年最難過就是擁有幾個物業的業主，被銀行call loan call到失魂，希望下半年可以唞下。
銀行猛call loan，大家以為樓價下跌好多，但事實又非如此，上半年下跌1.2 ％，不少評論家、玄學家跌晒眼鏡。當評論員話下半年樓市繼續下跌，已經有銀行家家人偷步入市買豪宅，正所謂「竹外桃花三兩枝，東江水暖鴨先知」，銀行家原來是「春江鴨」。
人口增加 樓價難跌
大家無留意老闆，原來老闆不停用普通話接外賣order，停下來的時候老闆話，不一定要做銀行家才知道春江水暖，做茶餐廳都可以。佢仲話，銀行家見到有咁多內地人來港定居，開戶口甚至買樓，知道樓價上升有乜出奇，仍然講樓價下跌的人根本是順口開河，甚至只是個人的意願希望樓價下跌，所以銀行家買樓極之正常。
不過，擁有負資產的銀行職員可能被迫賣樓，所以，見到有銀行職員賣樓先要了解情况，唔好立刻話銀行職員賣樓，樓價一定冧。
老闆話，近大半年到茶餐廳食早餐、午餐的內地人愈來愈多，而且差不多全部都有工作，假日就大多數叫外賣。
老闆又話，講普通話講到牙骱都梗晒，人口增加，樓價又點會下跌，更何況地產商現在都唔起樓，下半年樓價會有顯著升幅。
而且外資大摩已經轉軚，香港評論員在自己地頭都慢過人，很難令人信服。
原刊於《明報》，本社獲作者授權轉載。
