星期六早上去到茶餐廳，各客人的面色都唔錯，主要是美伊和談有實質進展，美股亦已反映，道指曾經升超過1100點，最主要是伊朗宣布，以色列與黎巴嫩在停火期間，開放霍爾木茲海峽，換句話說，只要維持和平，霍爾木茲是開放的，這個條件的含金量很重，對整個世界是有利的。
有客人話，有一個內地朋友，對買香港樓始終是猶猶豫豫，成日話香港樓太貴，發展商隨時會減價促銷，但近日不但唔講，而且仲立刻買了一個價值不菲的中型住宅單位，究竟是什麼原因，估計不會是伊朗開放霍爾木茲海峽。
老闆話，原因很簡單，就是深圳樓大減價，有一個樓盤減價30％促銷，引來大批市民搶購，減價本來是做生意手法之一，但是有不良效果，不但令到以往賣了該樓盤的買家不滿，甚至會令到打算買深圳任何樓盤的人有所警惕，擔心在買樓後，發展商失驚無神會大減價。香港樓雖然很貴，但發展商唔會突然減價，唔會突然間損失幾成樓價，所以話，深圳樓大減價間接替香港樓做宣傳。
老實說，香港地產商並不是洞悉天機，而是有血的教訓，大幅減價如果有承接還算好，如果沒有承接力，真係唔知點算，唔通減完再減，反而嚇到無人敢買，樓盤想唔爛尾都唔得，不如加多啲佣金，重賞之下，必有勇夫。
原刊於《明報》，本社獲作者授權轉載。
