2026年第一日去到茶餐廳，聽到有客人話今年樓市應該翻生，除了各項因素變得有利之外，連一向唱淡、話樓市好似一個深淵的大淡友都改為睇好樓市，認為樓市有5%升幅，雖然升幅輕微，但大淡友改變對樓市睇法就值得大家重視。
老闆話，各項對樓市的因素的確變得有利，但大淡友唱好可能並非那些因素，大淡友唱淡樓市的目的，就是希望銀行call loan，實力不夠的業主被迫賣樓，目的是可以多做生意，而事實上大淡友的目的亦達到。不過，又唔見到大淡友可以多做生意，原因是打算賣樓的業主，如果搵一個睇淡樓市的代理去賣，又點會賣得好，無業主叫大淡友賣樓，又點會多做生意。
現是最佳轉軚時機
不過，大家又不用替大淡友擔心，那些比大淡友睇得更淡、或者盲目鋤價的買家，就會搵大淡友代表他們出價，業主當然不會接受，最後依然得個桔，做唔到生意，想唔睇好都唔得。
雖然有人話大淡友睇好是被迫的，但又唔能夠一概而論，在人口及需求增加、供應不足，以及香港經濟亦回復增長之下，樓價止跌回升是極之正常，如果在這個情況仍然唱淡，只不過是包拗頸。另外，如果今年樓市有雙位數字的升幅，大淡友的損失就會很大，不但做唔到生意，而且有損自己的專業尊嚴，現在睇好是最佳轉軚時間，同時亦叫那些打算鋤價買家死了條心。
原刊於《明報》，本社獲作者授權轉載。
