星期二早上去到茶餐廳，聽到有客人講太古地產（1972 ）以22億元賣走兩間屋，唔使問阿貴一定是好消息；誰不知有客人話，太古賣樓折讓太多，對樓市有極壞影響。大家都明白，原來有傳媒對客人話成交價較意向價係有大幅折讓，仲唔係壞消息？
老闆話，唔怪之得經常聽到有客人講樓市正在下跌，又話邊個邊個賣樓又蝕咗幾多錢，但中原指數反而上升，今年已經升超過5%，如果唔係中原指數造假，就是傳媒報道錯誤。
老實說，傳媒並沒有報道那些成交蝕了幾多錢，他們只是話業主意向價是幾多錢，現在成交價比意向價低了三、四成，令人誤會業主蝕大錢，其實業主賺到開巷，而睇報紙的人大多數希望業主衰到貼地，自己將意向價代入買入價，其實，傳媒並沒有報道錯誤，只是引導錯誤。
不少業主對傳媒咁樣引導其實是相當不滿，明明賺大錢，竟然被講到好似蝕大錢，仲要被那些不知內情的人嘲笑。老實說，每一個業主賣樓的意向價一定會比成交價高好多，如果以此作為指標，認定業主蝕錢，即是所有賣樓的業主都是蝕錢，外地人睇到就會以為香港好慘。
其實，有投行報告指出，香港成年人的平均資產超過60萬美元（約468億港元），全世界排第三，僅次於瑞士同美國。所以，錯誤引導式報道令全世界誤解香港，以為香港正在淪陷，否則點會所有賣樓的業主都要蝕錢。
原刊於《明報》，本社獲作者授權轉載。
