BNO僅「校外課程」還未正式入大學

昨日早上去到茶餐廳，見父子兩人有爭執，原來老竇應承個仔，入到大學就送一部車畀佢。其實，個仔可以入大學，但條件是要完成一些既定校外課程，考試又及格，就可以正式入大學。

不過，按以往紀錄，入學率相當高，所以個仔要求老竇現在就買部車畀佢。老竇話仲未正式入大學，萬一入唔到，就算可以收回部車，折舊條數都好大，所以堅持唔買畀個仔。今次真係老竇有理，仔亦有理。他們一齊問我如何處理，我話唔識，不過可以參考積金局做法，全茶餐廳的客人都靜了下來，兩父子的事竟然積金局可以解決？

用BNO移居英國後還能提取強積金嗎？

既然問到我，我首先要講對強積金的睇法。在疫情下，不少人在財政上出現了問題，正所謂人窮思舊債，有不少人打強積金主意。我亦同意政府容許有需要的人可以提取部分強積金，但就不能夠以BNO移居英國來提取強積金。積金局解釋是BNO不被香港政府承認，當然不可以作為合法文件提取強積金，情况好似個仔讀校外課程，不能算正式入學，老竇唔送車亦合情合理，但問題是校外課程的確是由那間大學開辦，同正式入大學沒有分別，個仔話只是佢老竇唔承認，似乎又有道理。

其實，應該將個波交畀英國佬，只要英國政府立刻承認那些用BNO申請移居的人是正式移民，不用等5年咁耐，有了這個資格，應該可以攞到已供強積金全額，這對申請人是好事，否則英國政府5年後話唔批准，都唔知點算。

我同個仔講，叫大學出一封信，表示如果完成所需要讀的校外課程，一定會被取錄，有了這封信，老竇應該會買車送畀佢。個仔話有難度，英國政府亦唔會擔保以BNO移居英國的人，住足5年可以成為正式移民，大學又點會發這一封信？

原刊於《明報》，本社獲作者授權轉載。

湯文亮

紀惠集團行政總裁及副主席，2012年獲頒世界傑出華人獎、2016年獲頒香港浸會大學榮譽大學院士榮銜，以彰顯其傑出的企業家精神及領袖才能。1976年創立紀惠集團，對經濟發展具前瞻觸覺和分析力，在物業投資方面尤甚，帶領紀惠集團從一間小公司於2018年晉身至福布斯（香港區）排名25。著作有《讀歷史，了解香港地產》、《第十個人理論》、《逢三退一》，包括紅極一時「細價樓爆煲論」等10本著作，亦是專欄作家，作品在不少報章、網站及國內媒體發表，網站點擊已逾10億次。

View all posts