BNO似隨街派的coupon

有老友在行街時收到一張1000 元食肆coupon， 只要食2000 元就可以用這張coupon，老友搵我食晏，順便用了張 coupon，仲話唔用唔抵。我見老友興致勃勃，唔好意思潑他冷水，於是一齊去了那間食肆食午餐，在限聚令下，又唔可以叫多幾個人一齊食，兩個人食2000 元午餐，的確有多少浪費。

去到食肆時，侍應生知道我們用那張隨街派的 coupon， 立刻木無表情， 不但招呼冷淡， 仲有問不答，只是介紹我們食2000 元套餐，老友為了要用那張 coupon，無奈答應。老實說，那間食肆簡直是當我們是老襯，乾鮑變鮮鮑，龍蝦變大蝦，而且仲煮得唔好食。老友呻笨，佢話在疫情下，有很多食肆都有五折至七折，食幾多都得，點解要攞張coupon，自己搵自己老襯；但都是自己衰貪心，唔怪得人。

貪coupon「優惠」搵自己老襯

老友話請了我食一個貴夾唔飽午餐，有一些事情想請教我，原來世界上的確沒有免費午餐，我話即管放馬過來。老友話他絕對有資格攞BNO，更加可以用BNO到英國定居，6 年之後就可以攞英籍，錢銀方面唔成問題，他是否應該攞BNO移民英國。本來移民咁大件事，我不方便畀意見，但今餐飯有些少特別，我用coupon 做比喻，現在英國的BNO計劃好似隨街派的coupon，收到的人覺得唔用唔抵，於是扶老攜幼登陸英倫。在入境時英國關員見到香港BNO入境者，不但不會講一聲歡迎，而且會木無表情，因為他們知道香港人去到英國是搶他們的工作，消耗大英帝國的資源，所以不會表示歡迎。對於入境的香港人來說，這是一個不愉快經歷，不過要寄人籬下，只能夠忍一忍。

入境之後，那些用BNO入境的香港人就會發覺不但很難搵工作，就算搵到都是一些很低層工作，而且還要應付無數物業代理。至於點解要應付物業代理？梗係叫他們買樓，還可能聽到一些閒言閒語話唔買樓就唔好移居英國，就算可以唔做工，又買樓，都要等6 年，這6 年內每年最少要在英國住183 日，才可以符合入籍資格。不過，有得必定有失，當那些入境者每年住超過183 日，就要交稅，不但要交入息稅，還有資產增值稅，甚至遺產稅，不少人話，做得英國人，交稅就已經預咗；既然做得英國人，有什麼反華行動，就會有人上門通知閣下準時出席。我未講完，老友話今餐飯真係抵，究竟是什麼意思？

原刊於《明報》，本社獲作者授權轉載。

湯文亮

紀惠集團行政總裁及副主席，2012年獲頒世界傑出華人獎、2016年獲頒香港浸會大學榮譽大學院士榮銜，以彰顯其傑出的企業家精神及領袖才能。1976年創立紀惠集團，對經濟發展具前瞻觸覺和分析力，在物業投資方面尤甚，帶領紀惠集團從一間小公司於2018年晉身至福布斯（香港區）排名25。著作有《讀歷史，了解香港地產》、《第十個人理論》、《逢三退一》，包括紅極一時「細價樓爆煲論」等10本著作，亦是專欄作家，作品在不少報章、網站及國內媒體發表，網站點擊已逾10億次。

View all posts