抗疫上半場輸 下半場必須博

有老友話，林鄭上京，其中一個任務就是開放香港健康碼，佢擔心疫情會反彈，應該繼續現行政策，直至確診清零一段時間才可以考慮發出健康碼。如果現在開放，萬一疫情反彈，一定會被非建制議員及醫護鬧到失暈，就算建制派議員亦不是全部支持政府，所以，林鄭最好唔好要求中央政府開放健康碼。

我認為唔擔心得咁多，香港已經封關9個月，經濟受到重創，國泰（00293）不但要大量裁員，而且連港龍亦要即時結業，如果唔開關，將會有更多企業結業；到更多人失業，屆時政府想挽救亦無能為力。現在香港在抗疫方面做得唔錯，情況好似一場足球淘汰賽，上半場賽果只是落後0比1，隨時可以反敗為勝；但如果唔踢進攻足球，冇波入，就算唔失波都是輸1球，任何教練都會在下半場踢進攻足球，甚至以前鋒換後衛，才有機會反敗為勝。如果仍然打防守足球，不用等完場就知道一定輸波。

唔敢開關 始終不會反敗為勝

香港現在最大問題是軍心不穩，不少教練團成員及落場踢波的足球員都希望球隊輸波，他們就可以指摘領隊。林鄭也是一樣，全民檢測是抗疫一個好方法，但差不多變成全民抗拒，現在推行健康碼就會比較容易一些，但要多謝國泰，如果不是國泰大量裁員、港龍結業，估計會有人帶頭反對健康碼，現在當然冇人夠膽，甚至連攬炒都冇人講。這是政府推行健康碼或者任何抗疫方法的一個好機會，如果政府唔博，唔敢開關，始終不會反敗為勝，畀人鬧都唔抵可憐。

原刊於《明報》，本社獲作者授權轉載。

湯文亮

紀惠集團行政總裁及副主席，2012年獲頒世界傑出華人獎、2016年獲頒香港浸會大學榮譽大學院士榮銜，以彰顯其傑出的企業家精神及領袖才能。1976年創立紀惠集團，對經濟發展具前瞻觸覺和分析力，在物業投資方面尤甚，帶領紀惠集團從一間小公司於2018年晉身至福布斯（香港區）排名25。著作有《讀歷史，了解香港地產》、《第十個人理論》、《逢三退一》，包括紅極一時「細價樓爆煲論」等10本著作，亦是專欄作家，作品在不少報章、網站及國內媒體發表，網站點擊已逾10億次。

View all posts